بروکلین میں 25 جولائی کو عالمی امن کانفرنس، محبت، رحمت اور بین المذاہب ہم آہنگی کا پیغام دنیا بھر تک پہنچانے کی تیاریاں

امریکہ اور دیگر ممالک سے ممتاز مذہبی رہنما، علماء، سفارت کار اور سماجی شخصیات تمام انبیائے کرامؑ کی تعلیمات کی روشنی میں امن و اتحاد کے فروغ پر تبادلۂ خیال کریں گے

بروکلین، نیویارک: صوفی یونٹی فار انٹرنیشنل سولیڈیریٹی کے زیرِ اہتمام، مینیا یوتھ فورم کے تعاون سے “انٹرنیشنل پیس کانفرنس” کا انعقاد کیا جا رہا ہے، جس کا مرکزی موضوع “محبت اور رحمت — تمام انبیائے کرامؑ کا پیغام” رکھا گیا ہے۔ اس بین الاقوامی کانفرنس میں امریکہ، کینیڈا اور دیگر ممالک سے ممتاز اسلامی علماء، بین المذاہب رہنما، سفارت کار، ماہرین تعلیم، دانشور اور کمیونٹی رہنما شرکت کریں گے۔ یہ کانفرنس ہفتہ، 25 جولائی کو جلسہ ہال، 786 کونی آئی لینڈ ایونیو، بروکلین، نیویارک میں شام 4:30 بجے سے رات 9:00 بجے تک منعقد ہوگی۔ منتظمین کے مطابق پروگرام میں شریک تمام مہمانوں کے لیے اسنیکس اور عشائیے کا خصوصی انتظام بھی کیا گیا ہے۔ منتظمین کا کہنا ہے کہ کانفرنس کا مقصد ان عالمگیر تعلیمات کو اجاگر کرنا ہے جو تمام انبیائے کرامؑ نے انسانیت کو محبت، رحمت، انصاف، رواداری اور پرامن بقائے باہمی کی صورت میں عطا کیں۔ اس موقع پر مختلف مذاہب کے رہنماؤں، علماء، سفارت کاروں، ماہرین اور نوجوانوں کے درمیان تعمیری مکالمہ ہوگا تاکہ موجودہ دور میں امن، برداشت اور بین المذاہب ہم آہنگی کو فروغ دیا جا سکے۔ کانفرنس سے خطاب کرنے والی ممتاز شخصیات میں ڈاکٹر سید سیف الدین احمد الحسنی المائزبھنڈاری، صدر صوفی یونٹی فار انٹرنیشنل سولیڈیریٹی (امریکہ)، احمد محی الدین جوناتھن گرینوف، صدر گلوبل سیکیورٹی انسٹیٹیوٹ (USA)، مفتی سجاد رضا، چیئرمین امریکن مسلم ایڈووکیسی نیٹ ورک، شیخ فیصل حمید عبدالرزاق، بانی و صدر اسلامک فورم آف کینیڈا اور روحانی پیشوا اسلامک سنی کونسل آف کینیڈا، شیخہ مریم کبیر فائے، سینئر روحانی معلمہ، دی ودود سوسائٹی (امریکہ)، جبکہ بین الاقوامی مقرر سید معشوق معین الدین الحسن افتتاحی خطاب کریں گے۔ دیگر مقررین میں اعظمین اسرار مائزبھنڈاری، پی ایچ ڈی ریسرچر ویسٹرن مشی گن یونیورسٹی، قاری محمد فاروق، امام بلال خان، خطیب بلال مسجد، نیو جرسی، سید حمزہ شاہ، علامہ سید جبیر احمد (ایم جے اے)، صدر اہلِ وال جماعت امریکہ، اور معروف بین المذاہب رہنما، مصنف اور ماہر تعلیم مائیکل شیویک شامل ہیں۔ کانفرنس میں متعدد ممتاز سماجی و کاروباری شخصیات بھی خصوصی طور پر شریک ہوں گی جن میں محمد لطفل کریم، صدر بنگلہ دیش مرچنٹ ایسوسی ایشن بروکلین، محمد شمس الدین آزاد، صدر شکاگو یونیورسٹی ایلومنائی ایسوسی ایشن (امریکہ)، محمد نذر الاسلام، سابق نائب صدر بنگلہ دیش سوسائٹی انکارپوریٹڈ، ممتاز کاروباری شخصیت مشرف حسین، خصوصی مقرر علامہ سید مکرم علی الحسن (آر ایچ یو)، امام و خطیب اہلِ بیت مسجد، گیاس احمد، صدر (جے بی بی اے ) نیویارک، اور الحاج محمد سعید الدین، سیکریٹری جنرل اہل سنت والجماعت امریکہ شامل ہیں۔ منتظمین کے مطابق کانفرنس میں اس بات پر خصوصی توجہ دی جائے گی کہ انبیائے کرامؑ کی آفاقی تعلیمات موجودہ دور میں مذہبی انتہا پسندی، نفرت، تعصب اور معاشرتی تقسیم جیسے چیلنجز سے نمٹنے میں کس طرح رہنمائی فراہم کرتی ہیں۔ مختلف مذاہب اور ثقافتوں سے تعلق رکھنے والے رہنماؤں کو ایک پلیٹ فارم پر جمع کر کے باہمی احترام، مکالمے اور تعاون کو فروغ دینا اس کانفرنس کا بنیادی مقصد ہے۔ منتظمین نے تمام مذاہب سے تعلق رکھنے والے افراد، نوجوانوں، طلبہ، سماجی تنظیموں اور کمیونٹی کے ارکان کو اس اہم کانفرنس میں شرکت کی دعوت دی ہے۔ رجسٹریشن کے لیے دعوت نامے پر موجودکیو آر کوڈ کے ذریعے اندراج کیا جا سکتا ہے۔ توقع کی جا رہی ہے کہ انٹرنیشنل پیس کانفرنس نہ صرف نیویارک کی کثیرالثقافتی برادری میں بین المذاہب ہم آہنگی اور اتحاد کو فروغ دے گی بلکہ دنیا بھر میں محبت، رحمت، امن اور انسانی اخوت کے اس آفاقی پیغام کو بھی مزید مضبوط کرے گی جو تمام انبیائے کرامؑ نے انسانیت کو عطا فرمایا۔