سابق پولیس افسر اسٹیو چان کی بہادری،سڑک پر جاری خونریز جھگڑا رکوا دیا”ویڈیو وائرل

خونی تصادم کے دوران سابق پولیس افسر اور ریاستی سینیٹر نے جان خطرے میں ڈال کر لڑائی رکوا دی

نیویارک کی سڑک پر تین افراد کی خونریز جھڑپ، سابق این وائی پی ڈی سارجنٹ اسٹیو چان کی بروقت مداخلت، ویڈیو سوشل میڈیا پر وائرل

بروکلین، نیویارک 🙁 منظور حسین) امریکی ریاست نیویارک کے شہر بروکلین میں ایک سابق پولیس افسر اور موجودہ ریاستی سینیٹر نے جان کی پروا کیے بغیر سڑک پر ہونے والی خونریز لڑائی میں مداخلت کر کے صورتحال کو قابو میں لینے کی کوشش کی، جس کی ویڈیو سوشل میڈیا پر وائرل ہو گئی ہے۔ رپورٹس کے مطابق ریاستی سینیٹر اسٹیو چان، جو امریکی میرین کور کے سابق اہلکار اور نیویارک پولیس (NYPD) کے ریٹائرڈ سارجنٹ بھی رہ چکے ہیں، جنوبی بروکلین میں ایک اجلاس سے نکل رہے تھے کہ انہوں نے سڑک پر تین افراد کو آپس میں جھگڑتے دیکھا۔ جھگڑے کے دوران ایک شخص زخمی تھا اور زمین پر ایک چاقو بھی پڑا ہوا تھا، جس سے صورتحال کی سنگینی کا اندازہ لگایا جا سکتا تھا۔ ویڈیو میں دیکھا جا سکتا ہے کہ اسٹیو چان بغیر کسی ہتھیار کے نہایت پُرسکون انداز میں لڑنے والے افراد کے درمیان پہنچتے ہیں اور انہیں لڑائی ختم کرنے پر آمادہ کرنے کی کوشش کرتے ہیں۔ اس دوران ایک شخص دوسرے پر دوبارہ گھونسا بھی چلاتا ہے، تاہم سینیٹر مسلسل تحمل اور پیشہ ورانہ انداز سے کشیدگی کم کرنے کی کوشش کرتے رہتے ہیں۔ اسٹیو چان نے اپنے بیان میں کہا کہ “زیادہ تر لوگ خوف کے باعث ایسے واقعات سے دور رہتے ہیں، لیکن میں ایسا نہیں کر سکتا۔ جنوبی بروکلین کی سڑکوں کو محفوظ بنانے کے لیے ہر ممکن اقدام کرتا رہوں گا۔ ایک بار پولیس افسر، ہمیشہ پولیس افسر۔” انہوں نے مزید کہا کہ “میں نے اپنے ملک اور اپنے شہر کی خدمت اور حفاظت کا حلف اٹھایا تھا، اور آج بھی اس عہد کو پوری سنجیدگی سے نبھا رہا ہوں۔” سابق سٹی کونسل رکن آری کاگن نے واقعے کی ویڈیو فیس بک پر شیئر کرتے ہوئے بتایا کہ پولیس چند لمحوں بعد موقع پر پہنچ گئی۔ ان کے مطابق اسٹیو چان نے خطرناک صورتحال سے دور رہنے کے بجائے نہتے ہو کر آگے بڑھنے کا فیصلہ کیا اور اپنی پولیس تربیت، تحمل اور قائدانہ صلاحیتوں کا مظاہرہ کرتے ہوئے لڑائی کو قابو میں لانے کی کوشش کی۔ آری کاگن نے اسٹیو چان کے اقدام کو جرأت مندانہ قیادت قرار دیتے ہوئے کہا کہ انہوں نے ثابت کیا کہ حقیقی رہنما مشکل ترین حالات میں بھی حوصلے، بردباری اور بے خوفی کا مظاہرہ کرتے ہیں۔