جاپانی مسلمان ایک بار پھر غیرشرعی اعلان کیلئے تیار رہیں،28فروری کو چاندنظرآنے کا امکان نہیں لیکن روزے کا اعلان کردیاجائیگا
امریکہ میں پہلا روزہ یکم مارچ جبکہ جاپان، پاکستان، بھارت وبنگلہ دیش میں پہلا روزہ 2 مارچ کو ہوگا، تحقیقاتی رپورٹ دنیا انٹرنیشنل
ٹوکیو+تویاما (طاہرحسین+شاہ حسین سے)
دنیاانٹرنیشنل کی جانب سے جاری کردہ تحقیقاتی رپورٹ 2025کے مطابق امریکہ بھر میں 28 فروری کو رمضان المبارک کا ہلال نظر آنے کا قوی امکان ہے، چنانچہ امریکہ میں پہلا روزہ یکم مارچ جبکہ جاپان، پاکستان، بھارت وبنگلہ دیش میں پہلا روزہ 2 مارچ کو ہوگا، تفصیلات کے مطابق رمضان المبارک کے چاند کی پیدائش 27 فروری کو نیویارک اور واشنگٹن ڈی سی کے مقامی وقت شام 7 بج کر 44 منٹ اور کیلیفورنیا لاس اینجلس کے مقامی وقت شام 4 بج کر 44 منٹ پر ہوگی چنانچہ 28 فروی کی شام غروب آفتاب کے وقت نیویارک، واشنگٹن ڈی سی اور کیلیفورنیا میں نئے چاند کی عمر بالترتیب 22 سے 24 گھنٹے ہوچکی ہوگی، اس لحاظ سے امریکہ بھر میں رویت ہلال ہونے کا قوی امکان ہے اور یکم مارچ کو پہلے روزے کا اعلان کردیا جائے گا،جبکہ دوسری جانب جاپان کے مسلمان ایک بار پھر غیر شرعی اعلان کیلئے تیار رہیں کیونکہ ایک نام نہاد انڈین عالم دین کی ضد اور انا کی بھینٹ چڑھی ہوئی نام نہاد رویت ہلال کمیٹی جاپان کی جانب سے اس سال بھی غیر شرعی اعلان ہونے کا قوی امکان ہے،تحقیقاتی رپورٹ کے مطابق رمضان المبارک 2025 کے نئے چاند کی پیدائش ٹوکیو میں 28 فروری مقامی وقت صبح 9 بجکر 44 منٹ پر ہوگی، اس لحاظ سے جاپان، پاکستان، انڈیا اور بنگلہ دیش سمیت ملائشیا میں 28 فروری کو غروب آفتاب کے وقت ہلال نظر نہیں آئے گا لیکن ملائشیا اپنے مروجہ حسابی نظام کی بنیاد پر چاند کی رویت ہوئے بغیر یکم مارچ کے روزے کا اعلان کردے گا،اور اسی غیرشرعی اعلان کی پیروی کرتے ہوئے جاپان کی نام نہاد رویت ہلال کمیٹی بھی اعلان کردے گی۔ تحقیقات کے مطابق 28 فروری کو مغرب کے وقت کوالالمپور ملائشیاء میں نئے چاند کی عمر 10 گھنٹے اور 43 منٹ ہوچکی ہوگی جسکی رویت ننگی آنکھ سے کسی طور پر بھی ممکن نہیں، یاد رہے نئے چاند کو ہلال بننے کیلئے کم ازکم سولہ گھنٹے درکار ہوتے ہیں پھر ہی اسکی رویت ممکن ہوتی ہے لیکن ملائشیا کی رویت ہلال کے سرکاری ادارے“فلک”اور دیگر اعلی سرکاری حکام کے مطابق قمری کیلنڈر کی 29 تاریخ کو غروب آفتاب کے وقت ملائشیا میں نئے چاند کی عمر 8 گھنٹے سے زیادہ ہوجائے، بھلے اس دن ملائشیا بھر میں گھنے سیاہ بادل ہی چھائے ہوں، اور چاند بھی نظر نہ آئے تو وہ چاند کی پیدائش کے حسابی فارمولے کی بنیاد پرنئے اسلامی مہینے کے آغاز کا اعلان کردیتا ہے۔اور اگر 8 گھنٹے سے کم ہو پھر 30 دن پورے کرتا ہے، دنیاانٹرنیشنل کی تحقیقاتی رپورٹ 2025 کے مطابق امریکہ میں پہلا روزہ یکم مارچ جبکہ جاپان میں قاری علی حسن کے زیراہتمام شرعی رویت ہلال کمیٹی سمیت پاکستان، انڈیا و بنگلہ دیش میں پہلا روزہ ان شاء اللہ 2 مارچ کو ہوگا۔
