واشنگٹن: سوشل میڈیا پر گردش ہونے والی ایک ویڈیو میں دعویٰ کیا گیا ہے کہ ڈیموکریٹ کی صدارتی امیدوار کملا ہیرس نے سان فرانسسکو میں 13 سالہ لڑکی کو ٹکر ماری اور اُسے شدید زخمی حالت میں چھوڑ کر فرار ہوگئیں۔
ویڈیو کے وائرل ہونے کے بعد کملا ہیرس کے حامی ووٹرز ششدر رہ گئے کہ انسانی حقوق اور قانون کی پاسداری کی علم بردار کملا ہیرس کس طرح اس غیرقانونی اقدام میں ملوث ہوسکتی ہیں۔
کملا ہیرس کے ناقد بھی اس ویڈیو پر حیران اور پریشان رہ گئے کیوں کہ یہ واقعہ پہلے کبھی سامنے نہیں آیا اور کملا ہیرس کی سیاسی اور نجی زندگی اس قسم کے الزامات سے پاک ہے۔
جس پر مائیکروسافٹ نے اس واقعے کی اصلیت جاننے کے لیے تحقیقات کیں۔ جس میں پتا چلا کہ یہ ایک فیک ویڈیو ہے جو روس کے ڈس انفارمیشن آپریشن Storm-1516 نے بنا کر وائرل کی۔
مائیکروسافٹ کے تفتیش کاروں نے پایا کہ روسی پروپیگنڈا ادارے Storm-1516 نے ایک اداکار کو حادثے کی شکار کے طور پر ظاہر ہونے کے لیے ادائیگی بھی کی گئی اور پھر ایک جعلی ویب سائٹ کے ذریعے اسے وائرل کیا گیا۔
عالمی خبر رساں ادارے نے مائیکرو سافٹ کی اس تحقیق سے متعلق امریکا میں روسی سفارت خانے کے ترجمان سے تبصرہ کرنے کی درخواست کی لیکن تاحال کوئی جواب نہیں دیا گیا۔
یاد رہے کہ امریکی انتخابات میں روسی مداخلت کے الزامات نئی بات نہیں اس سے قبل ٹرمپ پر روس کی مدد سے منتخب ہونے اور ہیری کلنٹن کے خلاف روسی سازش بھی پکڑی گئی تھی۔
