نیو یارک : (دنیا انٹرنیشنل) نیویارک کے بروکلین گورمیٹ ریسٹورینٹ میں منعقدہ امن سیمینار میں مختلف مذاہب کے رہنماؤں کی موجودگی میں اسلام، مسلمانوں، اور پاکستان کی نمائندگی کرتے ہوئے یہ پیغام دیا گیا کہ اسلام ایک سچا اور پرامن مذہب ہے۔ مسلمان کبھی دہشت گرد نہیں ہوتے، بلکہ وہ الہامی کتابوں کا مطالعہ کرنے اور ان پر عمل کرنے والے ہیں۔ پاکستان بھی ایک پرامن ملک ہے جو ہمیشہ دنیا میں امن کا پیغام دیتا ہے۔
اس اہم تقریب کا اہتمام پاکستانی امریکن ریپبلکن پارٹی کی جانب سے کیا گیا، جس میں امریکی اور پاکستانی کمیونٹی کے افراد، مختلف مذاہب کے رہنما، اور نمایاں شخصیات نے شرکت کی۔ اس موقع پر تمام مذاہب کے نمائندوں نے اپنے اپنے عقائد کے مطابق دعائیہ کلمات پیش کیے، جس سے بین المذاہب ہم آہنگی کا ماحول پیدا ہوا۔تقریب میں ریپبلکن پارٹی نیویارک اسٹیٹ کے چیئرمین رچی بارزیمین، اسمبلی مین مائیکل نواکوو، اسمبلی مین ایلک بروک کرازنی، اسمبلی مین لیسٹر چینگ، نیویارک سینیٹر سٹیو چین، اور امریکی ڈپٹی قونصل جنرل محمد عمر شیخ شامل تھے۔ انہوں نے اسلام اور پاکستان کے امن کے لیے کردار کو سراہتے ہوئے کہا کہ یہ تقریب محبت، اتحاد، اور انسانیت کا بہترین مظہر ہے۔
اس تقریب میں شریک نمایاں شخصیات میں قیصر مصطفی بھٹہ (صدر پاکستانی امریکن ریپبلکن پارٹی)، جیمز سپرین (نائب صدر)، میاں ظفر اقبال (جنرل سیکرٹری)، مشتاق احمد کمبوہ (چیف کوآرڈینیٹر بین المذاہب امن کمیٹی پاک-امریکہ)، ولیم شہزاد (چیئرمین پاکستان کرسچین ایسوسی ایشن یو ایس اے)، چوہدری عاشق رسول (سماجی رہنما نیویارک)، ماجد حسن (سی ای او کامن گراؤنڈ)، میڈم سویتلاناں، مسٹر ایری گن، مارکو کیپی، عبدالعزیز بٹ، مرزا شیر بیک، راجہ ضمیر احمد، منور گوندل، نوید احمد، راجہ عبدالغفور، ماحد حسن، مشتاق احمد بلا، عبدالجبار، محمد مہتشم کمبوہ، راجہ ظفیر احمد، راوف بیگ، ملک ارشاد احمد تھیم، مرزا ندیم بیک، اور دیگر شامل تھے۔علامہ مشتاق احمد کمبوہ نے اپنے خطاب میں کہا “اسلام امن اور محبت کا مذہب ہے، جو دنیا میں بھائی چارے اور انسانیت کی تعلیم دیتا ہے۔ جو لوگ الہامی کتابوں کی تعلیمات پر عمل کرتے ہیں، وہ کبھی دہشت گردی کا راستہ اختیار نہیں کرتے۔ پاکستان بھی ایک پرامن ملک ہے جو ہمیشہ امن کا پیامبر رہا ہے۔”
ان کے خطاب کے دوران شرکاء نے “پاکستان زندہ باد” اور “جیوے پاکستان” کے نعروں کے ذریعے ان کے خیالات کی تائید کی۔ تقریب میں موجود مختلف مذاہب کے نمائندوں اور کمیونٹی رہنماؤں نے علامہ مشتاق احمد کمبوہ کی خدمات کو سراہتے ہوئے کہا:
“بابا جی نے اسلام اور پاکستان کا حقیقی اور پرامن چہرہ دنیا کے سامنے پیش کیا ہے۔”
“یہ تقریب دنیا کو ایک مثبت پیغام دینے میں کامیاب رہی ہے کہ اسلام اور پاکستان محبت، اتحاد، اور امن کے علمبردار ہیں۔”تقریب کے اختتام پر مختلف کمیونٹیز کے افراد نے دعائیہ کلمات میں دنیا میں امن اور خوشحالی کی دعا کی، جس کے بعد ایک پرتکلف عشائیے کا اہتمام کیا گیا۔یہ تقریب اسلام، مسلمانوں، اور پاکستان کے حقیقی اور روشن چہرے کو اجاگر کرنے کے ساتھ بین المذاہب ہم آہنگی کے فروغ میں ایک تاریخی سنگ میل ثابت ہوئی۔
