نیوجرسی (دنیا انٹرنیشنل) امریکی ریاست نیوجرسی میں پاکستانی نژاد امریکی شمع حیدر ، نیوجرسی سٹیٹ اسمبلی وومین کے ڈیموکریٹک پارٹی کے پرائمری الیکشن میں کامیاب ہو گئی ہیں ۔ پرائمری الیکشن میں کامیابی کے بعد شمع حیدر اب نومبر میں جنرل الیکشن لڑیں گی ۔ شمع حیدر جو کہ تیسری ٹرم کے لئے اسمبلی وومین کے الیکشن لڑررہی ہیں، کو منگل 10جون کو ہونیوالے ڈیموکریٹک پرائمری الیکشن میں اپنے اسمبلی ڈسٹرکٹ میں دو امیدواروں کاسا منا تھا ۔ آخری اطلاعات کے مطابق شمع حیدر نے پونے دس ہزار ووٹ لے کر پرائمری الیکشن میں کامیابی اپنے نام کر لی ہے ۔
نتائج کے اعلان کے موقع پر ڈیموکریٹک پارٹی قائدین ، ووٹرز اور سپورٹرز شمع حیدر کے اسمبلی ڈسٹرکٹ میں ان کے ساتھ موجود تھے ۔
پاکستانی امریکن کمیونٹی کی ممتاز سماجی ، سیاسی و کاروباری شخصیت میاں بشارت بھی اپنے قریبی ساتھیوں کے ساتھ موجود تھے ۔ نتائج کا اعلان ہوتے ہی ، انتخابی مہم کے آفس میں خوشی کی لہر دوڑ گئی ۔
میاں بشارت ، نے پوری پاکستانی امریکن کمیونٹی کی جانب سے شمع حیدر کو مبارکباد دی اور کہا کہ وہ پوری کمیونٹی کے لئے باعث فخر ہیں ۔ شمع حیدر نے بھی اپنے تمام ووٹرز اور سپورٹرز کا شکرئیہ ادا کیا کہ جنہوں نے الیکشن میں ان کا بھرپور ساتھ دیا اور ان کی کامیابی کو یقینی بنایا۔
