(راولپنڈی: (صفدر حسین سے
راولپنڈی اسلام آباد اور نواحی علاقوں میں طوفانی بارش نے تباہی مچادی، نالہ لئی میں پانی کی سطح 21 فٹ سے تجاوز کر گئی، دریائے سواں میں شدید طغیانی نشیبی علاقوں میں پانی گھروں میں داخل، درجنوں گاڑیاں پانی میں بہہ گئی، چکری کے علاقے لادیاں میں پھنسے 19 افراد کو محفوظ مقام پر منتقل کردیا گیا۔
راولپنڈی میں ریکارڈ بارش نے ہر طرف تباہی مچادی، نالہ لئی میں پانی کی سطح 21 فٹ تک بلند ہوئی، خطرے کے سائرن بجا کر لوگوں کو انخلاء کی ہدایت کی گئی۔ شہری گھروں کی چھتوں پر ازانیں دے کر اللہ سے مدد طلب کرتے رہے،پیرودہائی، ٹینچ بھاٹہ، اریہ محلہ، ڈھوک سیداں، قریشی آباد، گرجاروڈ، دھمیال، چکری، اڈیالہ روڈ، ندیم کالونی، جاوید کالونی پانی گھروں میں داخل ہوا جس سے شہریوں کا قیمتی فرنیچر، گاڑیاں اور ضروری سامان تباہ ہوگیا۔ نالہ لئی سے گزرنے والے ریلے نے دریائے سواں کے مقام پر تباہی مچائی، پوش ہاوسنگ سوسائٹیز میں بھی پانی داخل ہونے سے شہری محبوس رہے۔واسا حکام کے مطابق راولپنڈی اسلام اباد میں مجموعی طور پر 250 ملی میٹر سے زائد بارش ریکارڈ کی گی سب سے زیادہ بارش گوالمنڈی کے مقام پر 235 ملی میٹر، نیوکٹاریاں میں 220 ملی میٹر اور پیرودہائی میں 200 ملی میٹر بارش ریکارڈ کی گئی۔ کمشنر راولپنڈی عامر خٹک کا کہنا تھا کہ ریسکیو 1122 سمیت تمام ادارے ہائی الرٹ ہیں۔ ریسکیو 1122 نے پورے ضلع میں ریسکیو آپریشن جاری کر رکھا ہے، ترجمان کے مطابق لادیاں میں پھنسے 19 افراد کو محفوظ مقام پر منتقل کردیا، جبکہ مجموی طور پر 59 افراد کو ریسکیو کیا گیا۔ ہاتھی چوک نالے میں ڈوبنے والے بچے کی تلاش کی جارہی ہے، راولپنڈی کنٹونمنٹ بورڈ، چکلالہ کنٹونمنٹ بورڈ، راولپنڈی ویسٹ منیجمینٹ کمپنی سمیت تمام ادارے فیلڈ میں رہ کر شہریوں کی مشکلات کم کرنے کی کوشش کررہے ہیں،
موسمی حالات کے پیش نظر ضلع راولپنڈی میں ایک دن کی چھٹی کردی گئی
ڈپٹی کمشنر راولپنڈی نے چھٹی کا نوٹیفکیشن جاری کر دیا۔ ضلعی انتظامیہ نے عوام گھروں میں رہیں غیرضروری طور پر گھروں سے باہرنہ نکلیں۔
غیر معمولی طوفانی بارشوں اور سیلابی صورتحال پر پنجاب کے مختلف علاقوں میں رین ایمرجنسی نافذ، مریم نواز
وزیر اعلی مریم نواز شریف نے سماجی رابطہ کی ویب سائٹ ایکس پر پیغام میں کہا کہ غیر معمولی طوفانی بارشوں اور سیلابی صورتحال پر پنجاب کے مختلف علاقوں میں رین ایمرجنسی نافذ کر دی گئی ہے۔ مریم نواز نے کہا کہ سرکاری ادارے جذبے اور انتہائی محنت سے کام کر رہے ہیں، انتظامیہ کو عوام کو بزریعہ سائرن اور اعلانات آگاہ رکھنے کی ہدایت کر دی گئی ہے۔ وزیر اعلیٰ پنجاب نے کہا کہ عوام اداروں سے تعاون کریں، حفاظتی ہدایات پر عمل کریں۔
وزیراعظم شہباز شریف نے ہنگامی اجلاس طلب کر لیا
راولپنڈی میں بارش کے بعد سیلابی صورتحال کے پیش نظر وزیراعظم شہباز شریف نے ہنگامی اجلاس طلب کر لیا۔ ذرائع کے مطابق وزیراعظم نے چیف کمشنر راولپنڈی، ایم ڈی واسا سے فوری رپورٹ طلب کر لی۔ ذرائع کا کہنا ہے کہ اجلاس میں بارشوں سے ہونے والے نقصانات اور حفاظتی انتظامات کا جائزہ لیا جائے گا۔
وزیراعظم کا نیشنل ڈیزاسٹر مینجمنٹ اتھارٹی کا ہنگامی دورہ
وزیراعظم محمد شہباز شریف ملک بھر میں حالیہ شدید بارشوں اور دریاؤں میں طغیانی کی صورتحال کا جائزہ لینے کیلئے آج نیشنل ڈیزاسٹر مینجمنٹ اتھارٹی (این ڈی ایم اے) کا ہنگامی دورہ کریں گے۔ دورے کے دوران وزیراعظم کو ملک میں جاری بارشوں، سیلابی صورت حال اور ممکنہ خطرات کے حوالے سے تفصیلی بریفنگ دی جائے گی۔ این ڈی ایم اے حکام وزیراعظم کو حفاظتی اقدامات، متاثرہ علاقوں میں امدادی سرگرمیوں اور متعلقہ اداروں کے ساتھ مربوط حکمت عملی سے متعلق آگاہ کریں گے۔ کمانڈ اینڈ کنٹرول سینٹر کی جانب سے سیٹلائٹ امیجز کی مدد سے آئندہ دنوں میں موسم کی صورتحال اور ممکنہ خطرات سے متعلق پیشگی معلومات بھی فراہم کی جائیں گی۔ وزیراعظم کا یہ دورہ بروقت اقدامات اور متاثرہ علاقوں میں موثر امدادی کارروائیوں کو یقینی بنانے کے لئے کلیدی اہمیت کا حامل ہے۔
