نیویارک میں جمیکن قونصل خانے کے زیرِ اہتمام میگا جمیکن رائزنگ ڈے پریڈ میڈیا لانچ تقریب منعقد

بروکلین نیویارک، (منظور حسین سے)

جمیکا رائزنگ ڈے پریڈ 2026 کی باضابطہ رونمائی جمعہ کی شام نیویارک میں جمیکا کے قونصل خانے میں منعقدہ ایک خصوصی سفارتی اور میڈیا استقبالیہ تقریب کے دوران کی گئی۔

اس اہم تقریب میں سفارت کاروں، منتخب عوامی نمائندوں، کاروباری شخصیات، میڈیا نمائندوں، ثقافتی سفیروں، اسپانسرز اور دیگر معزز مہمانوں نے شرکت کی، جہاں اس تاریخی اقدام کے اغراض و مقاصد کو پیش کیا گیا۔

جمیکا کے قونصل جنرل کے دفتر کے اشتراک سے منعقد ہونے والی اس تقریب کا آغاز شام 6 بجے ہوا۔ تقریب کا مقصد جمیکا کی ثقافتی ورثے کو اجاگر کرنا، دنیا بھر میں مقیم جمیکن برادری کو متحد کرنا اور عالمی سطح پر جمیکا کی شناخت کو مزید مضبوط بنانا تھا۔

منتظمین کے مطابق جمیکا رائزنگ ڈے پریڈ ایک منفرد ثقافتی منصوبہ ہے جو نہ صرف جمیکا کی روایات، ثقافت اور قومی شناخت کو فروغ دے گا بلکہ کاروبار، سیاحت اور سماجی روابط کے شعبوں میں بھی نئے مواقع پیدا کرے گا۔

اس موقع پر پریڈ کے وژن اور مستقبل کے منصوبوں کو تفصیل سے پیش کیا گیا۔ تقریب کے دوران مقررین نے اس بات پر زور دیا کہ یہ پریڈ دنیا بھر میں مقیم جمیکن کمیونٹی کے درمیان روابط کو مزید مستحکم کرے گی اور نوجوان نسل کو اپنی ثقافتی جڑوں سے جوڑنے میں اہم کردار ادا کرے گی۔

شرکاء کو بتایا گیا کہ یہ ایونٹ عالمی سطح پر جمیکا کی کامیابیوں، ثقافتی تنوع اور قومی خدمات کو اجاگر کرنے کا ایک مؤثر ذریعہ ثابت ہوگا۔

جمیکا رائزنگ ڈے پریڈ کے چیئرمین ڈاکٹر بل ٹنگلن نے اپنے خطاب میں کہا کہ یہ اقدام جمیکا کے عوام کے عزم، محنت اور کامیابیوں کی علامت بنے گا۔ انہوں نے اس امید کا اظہار کیا کہ پریڈ عالمی سطح پر جمیکا کی مثبت شناخت کو مزید فروغ دے گی اور مختلف شعبوں میں بین الاقوامی تعاون کے نئے دروازے کھولے گی۔

استقبالیہ تقریب میں شرکاء کو باہمی ملاقاتوں اور نیٹ ورکنگ کے مواقع بھی فراہم کیے گئے، جہاں مختلف شعبوں سے تعلق رکھنے والے افراد نے پریڈ کی کامیابی کے لیے تعاون اور شراکت داری کے امکانات پر تبادلہ خیال کیا۔

اس موقع پر ثقافتی پروگراموں اور خصوصی اعلانات نے تقریب کو مزید یادگار بنا دیا۔ منتظمین نے اعلان کیا کہ جمیکا رائزنگ ڈے پریڈ کو مستقبل میں ایک سالانہ بین الاقوامی تقریب کے طور پر منعقد کیا جائے گا، جو جمیکا کے عالمی ورثے اور تارکین وطن برادری کی خدمات کو خراجِ تحسین پیش کرے گی۔

انہوں نے اس بات پر بھی زور دیا کہ نیویارک شہر اس تاریخی تقریب کے ذریعے عالمی جمیکن برادری کے ایک اہم مرکز کے طور پر اپنی حیثیت مزید مستحکم کرے گا۔

تقریب کے اختتام پر شرکاء نے جمیکا رائزنگ ڈے پریڈ 2026 کی کامیابی کے لیے بھرپور تعاون کا عزم ظاہر کیا اور اسے جمیکا کی ثقافتی عظمت، قومی اتحاد اور عالمی شناخت کو فروغ دینے کی جانب ایک تاریخی قدم قرار دیا۔