نیویارک (منظور حسین سے): پاکستانی نژاد امریکی قانونی ماہر اور فیڈرل ٹریڈ کمیشن کی موجودہ چیئر لینا خان کو نیویارک کے نومنتخب میئر زوہران مامدانی کی ٹرانزیشن ٹیم کی کو چیئر مقرر کیا گیا ہے۔ یہ تقرری شہر میں ایک ترقی پسند اور شفاف طرزِ حکمرانی کی جانب اہم قدم قرار دی جا رہی ہے۔ لینا خان، جو دنیا بھر میں کارپوریٹ اجارہ داریوں کے خلاف اپنے مضبوط مؤقف اور صارفین کے حقوق کے دفاع کے لیے جانی جاتی ہیں، نئی انتظامیہ کی پالیسیوں اور ترجیحات کے تعین میں کلیدی کردار ادا کریں گی۔ ماہرین کا کہنا ہے کہ مامدانی کی ٹیم میں ان کی شمولیت معاشی انصاف، شفافیت اور عوامی فلاح کے ایجنڈے کو مزید مضبوط کرے گی۔ سیاسی مبصرین کے مطابق، اینٹی ٹرسٹ قوانین اور عوامی احتساب میں خان کا وسیع تجربہ نیویارک شہر میں منصفانہ کاروباری نظام کو فروغ دینے میں مددگار ثابت ہوگا۔ وفاقی سطح پر ریگولیٹری اصلاحات کی قیادت کا ان کا تجربہ انہیں رہائش، عوامی ڈھانچے اور ڈیجیٹل اختراعات جیسے مسائل پر رہنمائی کے لیے ایک مؤثر انتخاب بناتا ہے۔ پاکستانی والدین کے ہاں پیدا ہونے والی اور امریکا میں پروان چڑھنے والی لینا خان نے متعدد مواقع پر کہا ہے کہ ان کی تارکینِ وطن پس منظر نے ان کے اندر عدم مساوات اور مواقع کی کمی کو سمجھنے کی صلاحیت پیدا کی۔ ایف ٹی سی کی پہلی پاکستانی نژاد چیئر کے طور پر ان کا انتخاب عالمی سطح پر ان کے اثر و رسوخ کا ثبوت سمجھا جاتا ہے۔ مامدانی اور خان کے مابین یہ اشتراک جنوبی ایشیائی برادری، خصوصاً پاکستانی نژاد امریکیوں کے بڑھتے ہوئے سیاسی کردار کی عکاسی کرتا ہے۔ مبصرین کے مطابق، یہ اشتراک ایک ایسی نئی سیاسی سمت کی نمائندگی کرتا ہے جو مقامی تحریکوں، عالمی تجربے اور ترقی پسند نظریات کو یکجا کرتی ہے۔
