اسلام آباد: (صفدر حسین سے )
علامہ اقبال اوپن یونیورسٹی میں گرین یوتھ موومنٹ کلب اور شعبہ زرعی سائنس کے اشتراک سے گذشتہ روز “آرگینک کچن گارڈننگ” کی تربیتی ورکشاپ کا انعقادہوا جس میں طلباء و طالبات کے علاوہ یونیورسٹی کے اساتذہ اور سٹاف ممبرزنے تربیت حاصل کی۔فیکلٹی آف سائنسسز کے ڈین /شعبہ زرعی سائنس کے چئیرمین، پروفیسر ڈاکٹر شیر محمدورکشاپ کے ریسورس پرسن تھے جنہوں نے طلبہ کو زہر اور کیمیائی کھاد سے پاک سبزیوں کی قدرتی کاشت کے طریقوں کے بارے میں سکھایا۔ انہوں نے گھریلو پیمانے پر صحت افزا نامیاتی سبزیوں کی کاشت ٗ قدرتی کھاد بنانے کے طریقے ٗ نباتاتی طریقوں سے کیڑوں اور بیماریوں کی روک تھام وغیرہ کے طریقے بھی سکھائے۔
اختتامی تقریب سے خطاب کرتے ہوئے ڈاکٹر شیر محمد نے کہا کہ اس تربیتی ورکشاپ کا مقصد طلبہ کو کچن گارڈننگ کی جانب راغب کرنا تھا جو صحت مند معاشرے کی ضرورت ہے۔انہوں نے کہا کہ دنیا بھر میں بازاری سبزیوں کی خریداری اور ان کے مضر اثرات سے بچنے کے لئے کچن گارڈننگ رواج پارہی ہے جبکہ پاکستان میں اس جانب کوئی خاص توجہ نہیں ہے۔
ڈاکٹر شیر نے کہا کہ بدقسمتی سے ہم سبزیوں اور دالوں کو اہمیت نہیں دیتے اور خود چلنے سے قاصر شیور مرغی کھانے کو ترجیح دیتے ہیں، اسی طرح ہم آرگینگ کچن گارڈننگ کو اہمیت نہیں دیتے اور کیمیائی کھاد سے تیار مارکیٹ کی سبزیاں کھاتے ہیں جو ہماری بیماریوں کی اصل وجہ ہے۔انہوں نے کہا کہ ہمیں اپنی سمت خود درست کرنی ہوگی، صحت مند معاشرے کے قیام کے لئے ہمیں اپنے ملک میں کچن گارڈننگ کو فروغ دینا ہوگا، عہد کرنا ہوگا کہ ہم میں سے ہر ایک نے اپنے گھر میں سبزیوں کی کاشت کرنی ہوگی۔انہوں نے کہا کہ کچن گارڈن آپ اپنے گھر کے کسی بھی حصے میں اگا سکتے ہیں، ہم اپنے گھر کی کھڑکیوں یا بالکونی کو استعمال کرکے ورٹیکل گارڈن سے اپنے گھر کی سبزی کی ضروریات پوری کرسکتے ہیں۔اس موقع پر گرین یوتھ موومنٹ کلب کی ممبر، ڈاکٹر صوفیہ خالد، گرین یوتھ کلب کے سیکرٹری ڈاکٹر محمد شوکت اور شعبہ لائبریری سائنس کے فیکلٹی ممبر، ڈاکٹر محمد عارف نے بھی کچن گارڈننگ کی اہمیت اور ضرورت پر اظہار خیال کیا۔ ڈاکٹر محمد شوکت نے گرین یوتھ موومنٹ کلب کے قیام کے اغراض و مقاصدبھی بیان کئے۔
تقریب میں یونیورسٹی کی ایڈیشنل رجسٹرار، بی بی یاسمین، اسٹنٹ رجسٹرار، رانا شرافت علی نے بھی شرکت کی۔تربیتی شرکاء نے ورکشاپ کے حوالے سے اپنی تاثرات بیان کرتے ہوئے کہا کہ بہت مفید تربیت تھی، ہمیں گھریلوں پیمانے پر صحت افزا سبزیوں کی کاشت کی تربیت دی گئی جس کے نتیجے میں اب ہم اپنے گھروں میں اپنی ضرورت کی سبزیاں اگاسکیں گے۔ ورکشاپ کے اختتام پر شرکاء میں اسناد تقسیم کئے گئے۔یاد رہے کہ وائس چانسلر، پروفیسر ڈاکٹر ناصر محمود کے وژن کے مطابق یونیورسٹی نے طلبہ اور فیکلٹی کی پروفیشنل ڈیولپمنٹ پر خاص توجہ مرکوز رکھی ہے یہ ورکشاپ اس سلسلے کی کڑی تھی۔
