کراچی: پولیس نے شیلنگ اور لاٹھی چارج کرکے مظاہرین کی امریکی قونصلیٹ جانے کی کوشش ناکام بنادی۔
مظاہرین نمائش چورنگی سے ٹاور اور ایم ٹی خان روڈ پر پہنچے تو امریکی قونصلیٹ جانے والی سڑک کنٹینرز لگاکر بند کردی گئی تھی۔ ریلی کے شرکا نے امریکی قونصل خانہ جانے کے لیے کنٹینرز کو عبور کرنے کی کوشش کی تو پولیس نے شیلنگ اور لاٹھی چارج شروع کردیا۔ اس دوران پولیس پر بھی پتھراؤ کیا گیا جس کے باعث علاقہ ایک گھنٹے تک میدان جنگ بنارہا۔
شیلنگ سے کئی لوگوں کی حالت غیر ہوگئی۔ ترجمان ایم ڈبلیو ایم کا کہنا ہے کہ شیلنگ اور لاٹھی چارج سے ریلی کے کئی شرکا زخمی ہوئے اور کئی کو حراست میں بھی لیا گیا۔
بعد ازاں ریلی کے شرکا نے زیر حراست مظاہرین کی رہائی کے لیے دھرنا دیا اور نماز مغربین بھی وہیں ادا کیا۔ کامیاب مذاکرات کے بعد پولیس نے تمام افراد کو رہا کردیا۔
ریلی میں موجود رہنمائوں نے مظلومین غزہ کی حمایت میں نکالی گئی پرامن ریلی پر پولیس گردی کی شدید مذمت کرتے ہوئے کہا کہ سید حسن نصر اللہ مجاہد اسلام اور امت مسلمہ کا فخر تھے۔ ان کی شہادت کے غم میں نکالی گئی ریلی پرپولیس کی شیلنگ شرمناک ہے۔
