پاکستان کی جانب سے بھارت کے فضائی حملوں کا بھرپور جواب دیا گیا، پاکستانی ایئر فورس نے رافیل سمیت بھارت کے 6 جہاز اور ایک ڈرون مار گرایا ہے جبکہ متعدد بھارتی چیک پوسٹ کو تباہ کردیا گیا ہے۔
وزیر دفاع خواجہ آصف نے جیو نیوز سے گفتگو کرتے ہوئے بتایا کہ پاک فضائیہ نے بھارت کے 6 لڑاکا طیارے مار گرائے ہیں۔
پاکستان نے کئی بھارتی فوجی قیدی بنا لیے ہیں: خواجہ آصف
خواجہ آصف نے کہا کہ پاکستان نے بھارتی جارحیت کے جواب میں کارروائی میں برتری حاصل کرلی ہے، پاکستان نے کئی بھارتی فوجی قیدی بنالیے ہیں۔ جن 5 بھارتی طیاروں کو مار گرایا گیا ہے ان میں سے ابتدائی دو طیاروں کے بارے میں دفاعی امور پر خبریں دینے والی ویب سائٹ نے دعویٰ کیا ہے کہ وہ سخوئی اور رافیل ہو سکتے ہیں۔ دفاعی امور پر خبریں دینے والی ویب سائٹ کے مطابق پاک فضائیہ نے بھارتی Su-30MKI طیارے کو اکھنور کے قریب مار گرایا، پاکستانی لڑاکا طیارے نے بھارتی طیارے کو فضا سے فضا میں میزائل کا استعمال کرتے ہوئے مار گرایا ہے۔سیکیورٹی ذرائع کے مطابق مار گرائے گئے بھارتی طیاروں میں 3 رافیل،1 مگ 29 اور ایک ایس یو 30 شامل ہے۔ اس سے قبل انٹرنیشنل میڈیا کو انٹرویو میں ڈی جی آئی ایس پی آر نے بھارت کے 2 جنگی جہاز مار گرانے کی تصدیق کی تھی۔
’’پاکستانی فضائیہ کے تمام جہاز محفوظ ہیں‘‘
سیکیورٹی ذرائع کا کہنا ہے کہ پاکستانی فضائیہ کے تمام جہاز محفوظ ہیں اور پاکستانی مسلح افواج دشمن کو جارحیت کا منہ توڑ جواب دے رہی ہیں۔ سیکیورٹی ذرائع کا کہنا ہے کہ پاکستان نے جوابی حملے میں بھارتی فوج کا انفنٹری بریگیڈ ہیڈ کوارٹر تباہ کردیا ہے جس کی ویڈیو منظر عام پر آگئی ہے۔ سیکیورٹی ذرائع کے مطابق بھارتی فوج کا 12 انفنٹری بریگیڈ 9 ڈویژن اور 15 کور کے زیر کمان ہے۔ سیکیورٹی ذرائع کے مطابق پاک فوج نے ایل او سی کے جورا سیکٹر میں دشمن کی ایک اور پوسٹ تباہ کردی ہے، اس سے پہلے پانڈو سیکٹر میں بھارت کی چیک پوسٹ تباہ کی تھی۔ لائن آف کنٹرول پر بھارت کی چھتری اور گفدار پوسٹ تباہ کی گئی، اسکے علاوہ بھی ایل او سی پر دشمن کی متعدد پوسٹیں تباہ کردی گئی ہیں۔
بھارتی خاکی ٹیکری پوسٹ کو پاکستانی آرٹلری نے تباہ کر دیا
پاکستان کی جانب سے بھارتی جارحیت کا منہ توڑ جواب دیا جا رہا ہے، بھارتی خاکی ٹیکری پوسٹ کو پاکستانی آرٹلری نے تباہ کر دیا۔ سیکیورٹی ذرائع کے مطابق لائن آف کنٹرول پر بٹل سیکٹر میں دشمن کی دھرمسل 1 اور 2 پوسٹیں بھی تباہ کر دی گئیں۔ سیکیورٹی ذرائع نے کہا کہ لائن آف کنٹرول کے نیزہ پیر سیکٹر کے مقابل بھارتی فوج کی شاہپور میں 3 پوسٹ بھی تباہ کی گئی ہیں، دشمن کی پوسٹوں کو مارٹر گولوں سے نشانہ بنایا گیا۔
کوٹ کٹھیرا سیکٹر میں دشمن کی سرلیا ون چیک پوسٹ تباہ
سیکیورٹی ذرائع کے مطابق کوٹ کٹھیرا سیکٹر میں دشمن کی سرلیا ون چیک پوسٹ تباہ کردی گئی ہے، دشمن کی پوسٹ کو مارٹر گولے سے نشانہ بنایا گیا۔ سیکیورٹی ذرائع کا کہنا ہے کہ بھارتی جارحیت کا پاک فوج اُسی کی زبان میں جواب دے رہی ہے، پاکستانی افواج کے جواب سے دشمن کو بھاری نقصان پہنچا ہے۔
