علامہ اقبال اوپن یونیورسٹی بلوچستان چیپٹر کا جلسہ تقسیم اسناد

( کوئٹہ : (دنیا انٹرنیشنل

علامہ اقبال اوپن یونیورسٹی کے بلوچستان چیپٹرکا کانووکیشن گذشتہ روز کوئٹہ میں منعقد ہوا۔گورنر بلوچستان، جعفر خان مندو خیل تقریب کے مہمان خصوصی تھے۔ وائس چانسلر، پروفیسر ڈاکٹر ناصر محمود نے میزبانی کے فرائض انجام دیئے۔تقریب سے خطاب کرتے ہوئے جعفر خان مندوخیل نے کہا کہ اوپن یونیورسٹی شہری علاقوں کے ساتھ ساتھ ملک کے دور افتادہ علاقوں میں یکساں اور اعلیٰ تعلیم دے رہی ہے جو قابل تعریف ہے۔ کامیاب طلباء و طالبات کو مبارکباد دیتے ہوئے انہوں نے کہا کہ اوپن یونیورسٹی  فاصلاتی نظام تعلیم کے باعث دنیا بھر کی ممتاز یونیورسٹیوں میں  ایک منفرد حیثیت رکھتی ہے۔اس ادارے کی یہ بھی خصوصیت ہے کہ کسی بھی عمر میں، یا ذات، مذہب کو بالائے طاق رکھتے ہوئے سب کو یکساں تعلیم کے مواقع فراہم کرتی ہے۔ گورنر بلوچستان نے کہا کہ یہ بات خوش آئند ہے کہ اوپن یونیورسٹی نے  جدیدڈیجیٹل انفارمیشن ٹیکنالوجی کو برؤکار لاتے ہوئے تمام پاکستان میں مقیم طلبہ کے ساتھ ساتھ بیرونِ ملک مقیم پاکستانیوں کے لئے بھی  مواقع فراہم کئے ہیں۔تقریب میں صوبائی وزراء، سیکریٹریز، ماہرین تعلیم اور والدین نے بھی شرکت کی۔اس موقع پر خطاب کرتے ہوئے وائس چانسلر، پروفیسر ڈاکٹر ناصر محمود نے کہا کہ علامہ اقبال اوپن یونیورسٹی اپنے علمی سفر کی نصف صدی مکمل کرچکی ہے اور اپنی گولڈن جوبلی منا رہی ہے۔ انہوں نے کہا آج تک اس قومی جامعہ سے 50 لاکھ طلبہ گریجویٹ ہوچکے ہیں جو ملک کے مختلف اداروں میں خدمات انجام دے رہے۔ڈاکٹر ناصر نے مزید کہا کہ ہمارا نعرہ ”تعلیم سب کے لئے ”یہی وجہ ہے کہ اوپن یونیورسٹی بلوچستان بھر کے طلبہ کو میٹرک کی تعلیم مفت دیتی ہے، کسی بھی ناگہانی آفت میں یونیورسٹی  اپنے بلوچستان کے طلباء و طالبات کے ساتھ مشکل گھڑی میں کھڑی ہوتی ہے اور فیسوں میں رعایت فراہم کرتی ہے۔وائس چانسلر نے گولڈ میڈلز اور ڈگریاں حاصل کرنے والے طلبہ کو مبارک باد دیتے ہوئے کہا کہ یہ یونیورسٹی آپ کی ہے اور آپ ہمارا فخر ہیں۔گورنر اور وائس چانسلر نے طلباء و طالبات میں ڈگریاں تقسیم کیں جن میں نمایاں پوزیشن حاصل کرنے والے طلبہ کو گولڈ میڈلز کے تمغوں سے نوازا گیا۔