ہری پور : وزیراعلیٰ خیبرپختونخواہ علی امین گنڈاپور کا کہنا ہے کہ ریاست ہمیں بغاوت پر اکسا رہی ہے۔ حویلیاں میں ورکرز سے خطاب کرتے ہوئے انہوں نے کہا کہ نواز شریف نے اس حلقے میں کچھ نہیں کیا، میں نواز شریف کی طرح جھوٹ نہیں بولوں گا، پی ٹی آئی فسطائیت اور فرعونیت کا مقابلہ کر رہی ہے، جو حال فرعون کا ہوا وہی حال ان لوگوں کا ہوگا، حقیقی آزادی تک ہماری تحریک جاری رہے گی۔وزیراعلیٰ خیبرپختونخواہ کا کہنا ہے کہ میں فوجی کا بیٹا اور بھائی ہوں مگر افسوس کہ فوج نے اسلام آباد میں ہم پر گولیاں چلائیں، پنجاب پولیس، رینجرز اور فوجی سپاہیوں نے اپنی عوام پر گولیاں چلائی ہیں، ریاست ہمیں بغاوت پر اکسا رہی ہے، آئندہ ہم پُرامن کا نعرہ نہیں لگائیں گے بلکہ گولی کا جواب گولی سے دیں گے، میں اپنی بات پر قائم ہوں کہ اگلی بار ہم پُر امن والی بات نہیں کریں گے، اگلی بار اسلحہ لے کر نکلے تو بتائیں گے کہ کون بھاگتا ہے، یہ عوام تمہیں ایسے نکالے گی کہ تمہیں بنگلہ دیش بھی بھول جائے گا، جعلی حکومت کو پیغام دیتا ہوں ہوش کے ناخن لیں۔علی امین گنڈاپور نے کہا کہ ہمارے 12 شہید اور 100 سے زائد زخمی ہیں اور میڈیا پر بیٹھائے گئے مداری کہہ رہے ہیں گولی نہیں چلی، ہمارے لوگوں پر ریاست نے گولیاں برسائیں اور شہید کیا گیا، گولی کیوں اور کس کے کہنے پر چلائی گئی اس کا جواب آپ کو دینا ہوگا، ہمارے لوگ لاپتا ہیں، خدشہ ہے ان کو بھی شہید کیا جاچکا ہے، 15 دسمبر کو شہداء جمہوریت کی یاد میں اجتماع ہو رہا ہے، ہماری جدوجہد جاری ہے اور جب تک ہم حقیقی آزادی حاصل نہیں کرلیتے یہ جدوجہد جاری رہے گی۔
