جاپان کے ولی عہد اور شہزادی آکی شِنو ترکی کے خیر سگالی دورے پر ہیں۔ شاہی جوڑے نے دونوں ممالک کے درمیان سفارتی تعلقات کی 100ویں سالگرہ کے موقع پر منعقدہ تقریب میں شرکت کی ہے۔ یہ تقریب جمعرات کی شام ترکی کے سب سے بڑے شہر استنبول کے مرکز میں واقع ایک ہال میں ہوئی۔ دونوں ممالک کے تقریباً 380 مہمان اس تقریب میں شریک ہوئے۔ جمہوریہ ترکی کی بنیاد 1923 میں رکھی گئی تھی۔ جاپان اور ترکی کے درمیان سفارتی تعلقات 1924 میں اُس وقت قائم ہوئے جب لُوزان معاہدے کے نتیجے میں پہلی جنگ عظیم کا باضابطہ طور پر خاتمہ ہوا۔ ترکی کے نوجوانوں اور کھیل کے وزیر کی تقریر کے بعد ولی عہد شہزادہ آکی شِنو نے تقریب سے خطاب کیا۔ ولی عہد نے جاپان اور ترکی کی تاریخ پر روشنی ڈالی جس میں نہ صرف معمول کے تبادلوں بلکہ مشکل وقت میں ایک دوسرے کا ساتھ دینے کے واقعات کا ذکر شامل تھا۔ ولی عہد نے ترکی کے ایک محاورے کا حوالہ دیا جس کے مطابق ’دوست وہی جو مصیبت میں کام آئے‘۔ انہوں نے امید ظاہر کی کہ دوطرفہ تعلقات مستقبل میں مزید مضبوط اور گہرے ہوں گے۔ تقریب میں ترکی کے قومی لوک رقص کے طائفے اور جاپانی تائیکو ڈرمنگ گروپ نے اپنے فن کا مظاہرہ کیا۔ ہر پرفارمنس کے بعد حاضرین نے دل کھول کر داد دی اور ولی عہد شہزادے اور شہزادی نے تالیاں بجا کر خوشی کا اظہار کیا۔
