اسلام آباد : (صفدر حسین سے) تعلیم ہر بچے کا بنیادی حق ہے مگر بدقسمتی سے وطن عزیز کے کم و بیش سوا دو کروڑ بچے آج بھی سکول جانے سے محروم ہیں، علامہ اقبال اوپن یونیورسٹی آؤٹ آف سکول بچوں کو تعلیم دلانے کے لئے بھرپور کوشش کررہی ہے” اِن خیالات کا اظہار یونیورسٹی کے وائس چانسلر، پروفیسر ڈاکٹر ناصر محمود نے گذشتہ روز انسانی حقوق کے عالمی دن کے حوالے سے اپنے بیان میں کیا ہے۔انہوں نے کہا کہ علامہ اقبال اوپن یونیورسٹی اپنے دستیاب وسائل کو استعمال کرتے ہوئے اس بات کو یقینی بنا رہی ہے کہ ایک بھی پاکستانی بچہ غربت اور داخلہ فیس کی وجہ سے تعلیم کے بنیادی حق سے محروم نہ رہ جائے، اس مقصد کے لئے علامہ اقبال اوپن یونیورسٹی سالانہ بجٹ میں مناسب رقم مختص کی ہوئی ہے جس سے ہم غریب بچوں کو فیسوں میں رعایت دیتے ہیں۔داخلہ فیس میں رعایت کی فراہمی کے علاوہ یونیورسٹی قبائلی اضلاع(سابقہ فاٹا)، گلگت بلتستان اور صوبہ بلوچستان کے بچوں کو میٹرک کی تعلیم بالکل مفت فراہم کرتی ہے۔ڈاکٹر ناصر نے مزید کہا کہ علامہ اقبال اوپن یونیورسٹی انسانی حقوق کے حوالے سے خواجہ سراؤں اور جیل کے قیدیوں کو بھی تعلیم مفت دیتی ہے جبکہ معذور طلبہ کو فیسوں میں خصوصی رعایت دی جاتی ہے۔
