کراچی: رہنما پی ٹی آئی علی محمد خان نے کہا ہے کہ ملائیشیا کے وزیر اعظم ہمارے لیے بھی قابل احترام ہیں، ہم احتجاج کیوں ملتوی کریں؟، حکومت بتائے کہ میانوالی اور فیصل آباد میں کون آیا ہوا تھا جو ہمارے کارکنوں پر لاٹھی چارج کیا گیا۔
حکومت کی جانب سے پی ٹی آئی احتجاج ملتوی کرنے کے معاملے پر سوال کا جواب دیتے ہوئے ان کا کہنا تھا کہ اگر کوئی احتجاج کرتا ہے تو حکومت کو ڈر کس چیز کا ہے ، کون سی کوئی فارم 47 کی حکومت گر جائے گی؟۔
انہوں نے سوال اٹھایا کہ فیصل آباد میں گھنٹہ گھر چوک کون آیا ہوا تھا؟ جو ہمارے کارکنوں پر لاٹھی چارج کیا گیا، پی ٹی آئی کارکنوں پر آنسو گیس برسائی گئی ۔ کیا میانوالی شہر میں بھی اقوام متحدہ آئی ہوئی تھی۔
ان کا کہنا تھا کہ احتجاج سب کا حق ہوتا ہے، ہمارے دور میں جے یو آئی ف اور پیپلز پارٹی نے احتجاج کیا تھا ہم نے کس کو ہتھکڑیاں لگائی تھیں؟۔
رہنما پی ٹی آئی کا کہنا تھا کہ غالب رائے ہے کہ آئینی ترامیم کے لیے حکومت کے پاس نمبر پورے نہیں، چھانگا مانگا سیاست کا دور دوبارہ شروع ہو جائے گا۔
